Yfirferð Steinunnar Steinþórsdóttur í Skuggahlíð yfir sögusteina í heimalandi hennar var einstaklega skemmtileg og athyglisverð. Fór hún við áttunda mann í hálfhring frá álfasteini sem liggur þétt við Oddsskarðsveg ofan vegamóta við Seldal, upp í hlíðina að Klofasteini þar sem gott er að hlaða sig orku og í sveig að Mundlaugarsteini en hann er þekktur að fornu fari og við fyrsta vísi af fornleifaskráningu, sem Skorrastaðaprestur framkvæmdi fyrir Dani á 18. öld og sagt er frá í Norðfjarðarbók var hann talinn til fornminja þar sem undir honum ku vera grafin mundlaug full af gulli. Til bjargar álfasteininum varð draumspekt Gyðu í Skálateigi og vegaverkstjórans Charlesar Magnússonar en samtals dreymdi þau það þrisvar sinnum að álfkona kom til þeirra og bað sér og börnum sínum griða í bústað sínum sem til stóð að sprengja við vegagerð á níunda áratug tuttugustu aldar. Af þessum sökum hnikaði Charles til vegarstæðinu svo steinninn mætti standa óskaddaður. Þá er Einbúi staður til þess að róa sig og sættast. Ferðafélagið kann Steinunni bestu þakkir fyrir leiðsögnina.

Ljósmyndir og texti Ína D Gísladóttir