Eins og myndirnar bera með sér var besta veður, fremur stillt og svalt þegar lagt var af stað í hina hefðbundnu hátíðargöngu frá Norðfjarðarvita í Páskahelli. Sólfar gaf ekki tilefni til sólardans þetta árið en undirritaðri er ekki grunlaust um að selir hafi smeygt sér í hami sína og rennt sér niður í voginn fram af hellinum þegar göngufólk, enn í hvarfi við hellinn, stóð við Bolabás og rifjaði upp sögur af bola Páls í Hrauni. Eins og séð verður á myndum var þetta hressandi indælis ganga, fremur fámennt en sannarlega góðmennt eins og ævinlega. Sleipt var í vatnsaganum utan og innan við hellinn og látlaus en falleg tilþrif haföldunnar þar sem hún lék á sjávarhörpuna, hnöttóttar misstórar ljósar steinvölur. Ljós og land aldrei eins, hver páskadagsmorgun ber með sér blæbrigði svo sem sjá má á myndum sem nú spanna um áratug.
Tíu manns gengu 2009 sem er í færra lagi, en á fjölda þátttakenda eru talsverð áraskipti. Undirritaðri finnst þessi ganga vera hápunktur páskanna. Í Páskahelli er fegurð himinsins innan seilingar.
Ína Dagbjört Gísladóttir
